2014年11月29日星期六

Brew Bros Coffee-花草香

同一班吃貨朋友聚餐之前想搵個位hea下XD
結果就係……
Cafe:^)
其實係受人影響,加上時間表問題,呢排多左去Cafe
今次去既係上環一間有花草茶既小店
花草茶好普遍,但佢特別在於加埋豆奶去沖調,幾啱我心水:^)

有聞此店既咖啡師係日籍人士
當日都多次親耳聽到有日本人同佢用日文交談
佢都識英文架xd,因為離開既時候佢好親切咁送門


Prana Chai $45

有時想拋棄咖啡因? Prana Chai幫到你(喂
Brew Bros既香料茶標榜天然無人工添加
係餐牌上面清楚講明係Aus進口既Chai Tea手工茶葉

手多多打開佢壺蓋望一望,濃郁而清新既花草茶香撲鼻而來
入口味道十分溫和,反而係豆奶味濃郁順滑
良久後肉桂等香料味道漸漸滲出,不過都唔會好刺激既
甜度一般,用蜜糖調味更夠自然
一壺仔都沖到兩杯左右:^)
個人偏好熱飲,另外認為熱力可以幫助香味散發,應該會比凍飲更香濃

環境乾淨舒適,光線剛好足夠照明又唔會太刺眼
只係座位真係唔多,而且冇咩大枱,建議係二至四人先好黎xd

永合成-日間煲

冬季一定要食煲!!!!!
永合成係罕見冇晚市既煲仔飯(通常入夜先多人食
聽講係香港幾出名同埋好好食
但因為地理位置真係唔多就腳唔近我,一直都冇緣一試
今次終於的起心肝趁係4pm打烊前快食一餐煲仔飯xd


窩蛋牛肉飯 $60

個人喜好就咁呢個配搭
拿拿臨點左煲仔飯,話咁快上枱食得!
 牛肉係另外炒好調哂味既,帶嚼勁又不黏牙
入味又唔會過分掩蓋肉香,一望好似好疏落好少料,但都夠撈飯
上枱時窩蛋已經變左溏心,有點可惜
飯底粒粒分明,飽滿鬆香,熱力幾平均
不過冇咩飯焦:^(,同埋我個人比較中意硬身d

排骨煲仔飯(加臘腸) $72

排骨肉質稔嫩,滑身香口
雖說是脂肪位幾多,但不韌不黏牙,仲有肉香,都叫肥得過既
其實我本身已經唔多中意排骨,加埋豉椒真係頂唔蒲
不過佢地豉椒既味道香濃而不粉,我就好憎黏笠又要帶粉狀果種感覺,好彩呢個唔係
飯底同剛才牛肉版本同出一轍,冇咩飯焦真係有d遺憾/___
佢地既豉油不甜,但唔係淨鹹味仲帶香既,重口人士忍唔住狂落
份量偏少,一般食量既屋企人食左一煲都話覺得唔算飽肚
整體黎講佢唔係難食既,只係唔太啱我個人口味
價錢又唔係話好平,時間同地點不太方便,我都係試過就算

2014年11月28日星期五

The Night Market-小夜市

話說有時經過The Night Market
感覺又唔似夜市既氣氛
看罷餐牌……嗯……價錢也完全不是那回事
因此一直都冇試過,直到某天下午茶時段……

下午茶點心套餐 $8x 
以揀四款小點及一杯飲品,另外仲有粉麵餐既
其實有d算特別既點心款式既,將台式小食融入中式點心
加上唔係好好粉麵
都係試番點心算,仲可以試多幾款嘛XD

麻糬三杯雞球感覺幾有特色既
外層香脆,保留熱度唔會硬得刮口
灑上紫菜碎同本身沾附既白芝麻,增添香氣
咬落尚算煙韌,糯皮帶甜度,但唔可以叫做香口
三杯雞餡唔多,味道亦頗為溫和,很易嚐出清濃既九層塔香氣

紫菜蚵仔卷外面係酥脆香口既,只係感覺頗為油膩
味道十分濃郁,好重蚵煎既香氣及味道
質感稠身微黏,話說咬到入去就會有少許粉漿感
加上份量細少又唔多足料……

香蔥牛肉卷餅都係超級的骰既!!!!!
卷餅帶有微微既焦香,完全沒有油膩感覺,卻不會乾身至出現裂痕
香蔥味道不大,只有極少既清香味
牛肉稔身不老柴,肉質可謂滑嫩爽口,但少到冇朋友

台式鮮肉小籠飽既湯汁很飽滿,豐潤帶肉甜味
外皮乾身得反光,令人誤會佢係乾到冇哂水好韌好難咬咁XD
只係佢外表誤導左,其實係夠湯又名稔軟
皮算係薄身,有延展性冇破爛
肉餡帶有稔香,唔係乾水硬實一塊咁,食食下幾順口又唔算好膩

雙圓冬瓜茶有平時聽得多既芋圓同地瓜圓就暗藏係呢杯飲品入面
不過大小整到好似飲熱朱古力落果D好細粒既棉花糖咁
話咁易就可以用飲管吸上黎XD
但佢就唔係煙韌既糯感,反而係好黏軟好粉,而且甜度較高
芋圓就唔太嚐到芋香,而地瓜圓味道較突出
冬瓜茶入口清甜不膩,茶清稀身,唔會有漿口及膩感

2014年11月26日星期三

亞坤-凍冰冰

經常排長龍既過江龍不得不試
本身想食下佢地出名既吐司,只係當日有少許唔舒服,想食熱少少既野
所以最後揀左椰漿飯,結果是惡夢的開始……

 環境真係唔好提,衛生到枱面泛哂油光
咁我自己有潔癖就算啦,又唔好咩都賴哂人……
只不過,第一次去係幾隻蒼蠅,第二次去有蜜蜂
其實我想問好耐……
我係去左香港公園定去左間餐廳?

椰漿飯 $48

炸雞係大舊多肉,感覺上就大份足料既
但凍到滲哂油,炸皮稔軟而唔係正常該有既脆度
唔好食既你俾咁大份我有咩用?:^(((((((((((((((((((((((

其他伴菜都係凍既,不過呢d食物凍就有道理姐……
左上既豆角雖然油,但香口夠味
重點就係佢油,調味只係包褢係外面,豆角仲係清甜爽脆
酸瓜清新爽口,酸中帶微甜,唔會太刺激,仲幾醒胃
參巴醬辣中帶少許甜味,又有微微鹹香鮮味
油份唔算太多,唔會好膩口

椰漿飯帶椰香,唔會過份濕黏,冇爛飯情況出現:^)
結塊不多又有少許嚼勁
煎蛋帶焦香,但蛋白部分有點老韌,蛋黃就係溏心既
整體黎講份量幾少,價錢又唔平,唔抵食/___

另外一提飲水要俾錢,隔離枱話係新加坡既慣例
我冇去過就唔知啦,但有親戚住果邊
加埋上網搵資料都完全冇提過有咁既事……

2014年11月24日星期一

炊豕店-炸脆豬

以前經過好多次,見到有肉燥就已經想試
仲有幾個食過既朋友都話好食抵食
兩個要趕學校野既人去到遠一遠食飯XDDD
無奈朋友表示興致索然,但兜兜轉轉最後都係試左:^)

餐牌選擇唔算多,清清楚楚列得一目了然
十分適合三心兩意既選擇困難症患者……就好似我咁xddd

環境佈置幾特別,古早味裝潢中夾雜一點新潮裝飾
牆上面寫左店名中「炊」、「豕」兩字既讀音及字義
睇黎都知道唔少朋友對於呢d唔常見既字感到陌生xd
有玩味之餘又有教育意義,仲可以令人加深對餐廳印象,幾叻叻既:^)
店面比較窄細,座位都唔多,適合約莫兩、三人既組合

豬排肉燥飯加滑蛋(多飯) $55

豬排份量幾多架,足料冇呃秤
外層炸皮唔厚,脆度一般但冇滲油
厚身但內裏非常稔軟入味
未至於十分嫩滑,不過係保有適量水分便於嚼咬

肉燥既肥肉香口惹味,唔會油膩到食到就想吐出黎
雖然佔量不多,台灣通朋友亦表示點都比唔上台灣
但感覺算係幾夠風味,或者係受埋環境、氣氛等等既因素影響啦xd

多飯唔使另加錢,都係$45
米粒係短身既,唔同平時食既瘦長泰國米
煮出黎既飯粒飽滿更有點煙韌
加埋枱上香氣甚重既辣椒醬仲正
嗌得多飯就梗係要食哂佢啦,唔好貪便宜就浪費食物呀!
上面寫既價錢係計埋另加滑蛋加$10
其實唔太滑身,只係算仲有蛋汁又唔係老韌咁

南乳豬手撈粗麵 $43

當然唔只食一個飯,仲嗌埋麵 !
 豬手香稔皮嫩有彈性,連有少許豬肉,夠濕潤容易嚼咬
南乳味香濃入味,又唔會濃得嗆口
只係加上稠身既醬汁個賣相就唔多吸引

粗麵唔係想像中咁粗身……
唔會煮到太淋爛,同埋幾索味,醬汁黏附得好好
不過就食唔到麵既香味,亦都唔係話好有咬口
份量比飯少,加麵底就要加錢,所以如果係為填肚既朋友可以揀配飯

2014年11月19日星期三

金滿庭-重食物

先前經過金滿庭,翻翻菜牌,菜式似乎幾合胃口
因此又講過話要去試一試
今次算快手啦,大概一個月就真係同呀媽去左食啦,兌現諾言架!xd


餐前小食(晚市限定) $15

拍青瓜爽口不會過分淋爛,帶水分算濕潤
辣味香而不嗆,甚易入口
連我唔太食辣既都可以一口接一口
加上有少許醋酸,味道開胃又夠清新
雖然不得不說佢係十分多油既,但酸辣香味仲係可以解下膩既

糖醋魚塊 $96

一上枱已經聞到陣陣酸甜香氣!!!!!
迫不及待試過先:^0

整碟既份量不算多,只係魚塊都叫大塊,炸漿不會過厚
外層香脆不膩,仲好黏到汁,咬落唔會黏牙
魚塊有魚肉香氣,沒有腥味,嫩滑可口
醬汁稠度剛剛好,酸甜得宜,加埋入炸魚塊食可以大大降低膩度

配菜都係菠蘿青椒咁啦
菠蘿係罐頭開既,甜中帶絲絲酸味,連醬汁食都唔會太假既
青椒爽脆新鮮,青味唔會太重,仲保有水分,幫手解解膩

京燒羊腩 $138

外層薄得酥脆卻不油膩
羊腩肉質稔軟可口充滿肉香,咬落有少許油香既肉汁
中間係油脂瘦肉分層,配搭起來起入口即化,豐腴留香之效
香脆同軟稔兩種質感對比交織卻是十分合襯
另外係佢調味得宜,突顯羊肉香氣而非遮蓋
夠入味,肉香重又唔多羶:^)

可惜係佢既醬汁唔利口
雖然通常都係點呢類野,但薄荷啫喱真心似牙膏

排骨蛋炒飯 $72

炸排骨姐係炸有骨豬扒咁:^0
炸漿厚度可接受,香脆得黎唔會容易同肉扒分離(Y)
不覺油膩,反而係肉香自然,肉質稔身
未至於話香嫩,但保持濕度肉汁,不會過乾鞋口柴皮,有適度嚼勁
沾上椒鹽或是酸辣醬各有風味
最大問題係……佢唔夠熱!!!!!
內裏係夠熟,外層又冇滲油,溫度只係微暖既
如果此等炸物可以好似京燒羊肉咁熱上就更好食

炒飯乾身,粒粒分明
食落有蛋香及淡淡蔥香,彈牙易嚼

豆沙鍋餅 $52

餅皮微脆,上桌時夠哂熱力,冇滲油冇軟化,繼續乾身帶嚼勁
外層附有陣陣焦香味,卻不是焦黑燶身所致
餡料分佈不太平均,有一邊係多餡至有點甜膩,另一邊則是多酥餅至有點油膩
豆沙餡料甜度偏高,但細密綿軟,味道可算自然

茶品 $11

揀左人蔘烏龍
茶苦得黎溫和不澀,順口帶香
飲落有淡淡人蔘香氣,重點係佢會回甘
清新解膩,仲好養甜咁,啱哂食油膩餸菜時紓緩下腸胃

服務我就覺得麻麻啦……
有部分員工係新入職既,會戴住個牌仔寫明,方便認又更易得到顧客體諒
咁我都唔係十分嚴厲,只係我注重佢地是否主動親切-__>
我明白飲食業真係難做真係辛苦既(做過)
攰係在所難免,仲要唔係十幾廿歲咁有活力既年齡層就更係艱難
希望佢地儘快適應到,知道自己要做咩,知道自己做緊咩,知道顧客想要咩……

Barista Jam-咖啡香

好友既好友真心推介話Barista Jam可能係全香港最好飲既咖啡
加上好友係Cafe狂熱者(?)
約到出去吃貨一日遊又點可以唔尋訪下呢?:^)

環境係休閒風
其實有兩層,唔係想像中咁細架:^)
講真想坐下入口旁邊一堆高櫈(有條癮),可惜當日已經滿座
無緣

Today's Brew

用來自尼加拉瓜既咖啡豆研磨調製
味道溫和,帶有十分清淡既果香
酸度不高,飲落冇嗆喉既感覺
平時飲開落糖落奶既可以試下咩都唔加

Brownie Cake

飲咖啡之餘,吸收一點糖分也不足為奇
今次就試下賣相特別又吸引既朱古力布朗尼蛋糕啦:^)
外形尤如火山,呈塔狀
外層係脆薄既朱古力,不過味道似乎過甜了,甚至有點膩口

叫得做Brownie,令人有個既定想法係平時食開外脆內軟,稍有嚼勁既版本
呢下真係大開眼界,明明係Brownie,點解入面同忌廉蛋糕咁似既?
朱古力香氣係就係濃郁,但成個感覺係顛覆哂,而且並非係正面既印象……

中間已經唔可以叫佢Mousse Cake,因為係綿柔到好似泡沫好似忌廉咁
入口即化,甜度高,朱古力味香濃但同時係好甜膩
外面有朱古力脆皮,中間大量朱古力忌廉
整體感覺係食緊一堆唔知咩野!!!!!

服務感覺幾用心既
店方詳細解答我地既問題,可見其專業及認真
另外仲會推介款式及飲用方式,幫有選擇困難症既顧客(我地呢就係d咁既人
咖啡上枱既時候佢地又會再提醒同講解一下
增加左少許對咖啡既認識,更能品味到咖啡既色香味

2014年11月17日星期一

Motorino-煙韌皮

是咁的,呢間Pizza其實想試好耐!
打從一次途經,見到入面有對男女
女既食緊成個Pizza,男既食緊Calzone
真爽!!!!!
我都想試下係咁!
結果過左好耐好耐好耐先黎試,同埋係淺嚐分享版……

Soppressata Piccante $148+10%

呢個聽聞係幾受歡迎既辣味款式
底醬都係用茄醬,辣在辣肉腸同埋又有少許紅辣椒粒
重點係佢帶點不嗆喉既溫和蒜香
芝士都用左兩種,Mozarella同Pecorino,香味濃郁,稍有牽絲同調味增香
Napoleon Pizza個底都係薄身d
雖然d料真係好易跣出黎,個薄餅底又易濕
但佢係少少爛既跡象都冇!!!!!
仲好煙韌好有彈性,邊位又帶點焦香:^)
我地兩個都係中意厚身餅底
不過呢間真係整得幾好食,而價錢同市價相約,可以一試:^0!

好可惜佢冇左Calzone(好似係,menu冇寫;^;



2014年11月12日星期三

C'est La B-高價位

一直冇試過Ms. B’s Cakery既出品
賣相精緻吸引我諗不少見過佢地製成品既人都有同感
但佢既價錢價位亦是十分亮麗

今次去到上環PMQNight Market
見到佢地有個攤檔
好啦!點都想試下!希望唔係淨係得個樣:^0
結果打開銀包拿出兩張一百元紙幣……


Taster Cake Set $126

可以自由組合Ms. B's Cakery既三款蛋糕
其實好細件,一個人食完都完全冇飽滯既感覺……
由左數起,我揀左:Lollipop、Sunshine、Madame Butterfly

Lollipop色彩豐富吸引,粉色系彩虹,感覺溫和順眼
面頭有彩色爆谷,帶淡淡牛油香,乾身微脆,咬落有粟米香氣
白朱古力同忌廉一向係我棹忌既用料,因為好易有人工味同埋重膩感
白朱古力碎幾甜下,同埋難免會膩,用碎都叫做好少少
忌廉雖然帶少許膩度,但總算叫細滑帶甜,奶香濃郁

下層既彩虹蛋糕叫人萬分期待!!!!!
鬆軟綿稔既蛋糕層散發清新自然雲尼拿香
重點係中間都有少少櫻桃啫喱,酸甜有果香,開胃解膩
整體黎講呢個蛋糕味道配搭係不錯既
雖則我真係對佢白朱古力同忌廉唔太有好感……

Sunshine係檸檬罌粟籽蛋糕!!!!!
一見到已經好想食!嗜酸既朋友識揀一定係揀呢款XD
表面插左朵精美像真既花朵,成個感覺即刻高左幾級:^0,真係幾靚架
好啦其實都唔想講……最高果層又係忌廉
只係佢今次有少許檸檬清香,但膩度仍然係存在既

罌粟籽蛋糕夠綿夠香,食落好清新
蛋糕偏乾,配合中間既檸檬餡就濕潤少許
檸檬餡真係夠哂酸,正正子!!!!!
開胃得黎唔會乸口,仲好重好重檸檬既清香
只係好可惜佢實在太精緻,兩啖就冇;^(

Madame Butterfly似乎係佢地比較有特色既出品
用上同品牌名字相約作蛋糕名銜,大概都係推介之選、自信之作
藍蝴蝶係手工製作既硬糖,但我都係冇食到XD
黑白相間既朱古力片同佢托底紙相映成趣,整體感覺一致
中間有杏桃果醬,酸甜解膩,又增添果香

第一層呈紅色既係紅菜頭蛋糕
食過紅菜頭既朋友可能會覺得佢味道好獨特……講真幾青
只係呢個蛋糕又唔會令佢重青味,有絲絲清香唔會過頭
第二層綠綠地色既係開心果蛋糕
開心果味都幾濃郁,但佢既感覺係清清地,唔係話好似平時食果仁既油膩感
最底一層就係朱古力蛋糕
朱古力味非常香甜濃郁,仲帶有微苦甘香

蛋糕層係好鬆軟好軟密既,越食到底佢既水分就越高咁
加上佢由清味至濃味,層層遞進
因此食落係唔會覺得甜膩,仲好有層次感同易入口

服務真心幾好架
唔係去店舖食野,仲要有優惠價(雖然都仲係好貴
店員都會一一慢慢去介紹番用料同味道組合
除左貼心服務態度,仲顯出佢地都幾熟悉工作店鋪既出品
而唔係好似有時見到,唔知自己舖頭賣緊咩,純打工既職員:^0

2014年11月11日星期二

Jacomax-扭蛋機

小時住在港島區,每逢假日同父母外出,大多去太古城及康怡逛逛
最愛喝的就係沙龍餐廳既粟米湯,可惜多年前已經結業
剩下的,只有記憶中Pizza Hut的兒童餐
我同呀爸都中意食薄餅,次次一齊出去都係食呢味
特別會去太古城中心既Pizza Hut,因為現在只能在那重拾小時候的回憶

只係一年一度呀爸生日,當然想食好啲
如果又係去Pizza Hut,好似同平時食開冇咩分別,總想找些特別的
結果上網見到呢間係鰂魚涌的薄餅店,看照片就好像不錯,不如就一嚐吧?
(注意:以下兩個人食既份量多得太過驚人,但總叫真金白銀非試食)

   
甫踏入餐廳,四周有點黑漆漆的,雙眼還未適應過來
環境算是帶點酒吧風,燈光暗淡,好似要啤一啤去配合氣氛
周邊均有色彩豐富又富玩味既裝飾擺設,感覺輕鬆不少

廚房設透明玻璃,可以看到師傅製作食物的過程

Salmon Toast $89

純粹見到隔離枱有點菜才會選的一款
十分簡單的前菜小食,只是將煙三文魚放上塗上忌廉芝士的法包之上
再放上迷迭香及水瓜榴,輕鬆完成!

法包微微烤過,帶有焦香以及相應的香脆感
抹上薄薄均勻的一層忌廉芝士後,芝香濃郁,卻不會濃味過頭
煙三文魚筋位不多,鹹香味濃,不算油膩,正好成為亮點
迷迭香香氣獨特而突出,配上酸香解膩的水瓜榴,整份入口恰好無膩


Jacomax(Regular 12") $140

來到Pizzeria,總要叫個薄餅過過癮吧?
詳閱餐牌,大概以店名命名的都是店方最引以為傲的一款
那麼就來個普通尺寸的Jacomax,相等於Pizza Hut大批的大小

上桌果然是大大份一個,但賣相有點參差
先是圓得不夠均稱,有點橢圓的形狀,只可說手工薄餅就可能有此缺點
再者是色水太過偏白,看上去毫不吸引,有點教人失望
不過賣相也罷,我們認為味道還是最重要的一點

底膏用的是蕃茄,酸甜清香,可惜味道太淡,不夠惹味
薄餅之上加上牛肉碎,肉稔不乾,沒有太多脂肪位,帶有少許肉香
而軟身切條的三色椒算是稍為帶來點點清甜以及色彩
店方所用的是Mozzarella芝士,但太少太薄身,做不到牽絲的效果,且香味乏乏
薄餅中心打的算是保險的,蛋香不腥,食味頗合整體配搭

薄餅批邊脆香不硬,有少許烤過的焦味,燶的部分不算過多
咬下去頗算香口,咀嚼一會就滲出淡淡輕輕的麵香
批底厚薄適中,比較韌身,加上餡料後都未會因其水氣以變軟變淋變爛
還是可以承托著餡料,若是味道更濃香,賣相更精緻,應該能吸納再多客人

Lasagne Carne Della Mama $90

食完個薄餅還是不夠,再來一個千層麵
上桌才知份量是約手掌心大小,大胃父女表示輕鬆應對

烤焗得熱辣奉桌,芝士溶溶的,略帶牽絲這點夠吸引了
表面微微烤焦,入口卻沒有想像中的苦燶味,仍然只有焦香
千層麵煮得稔身不過爛,片片還是完整無缺的
用叉子垂直片開,看見層層緊貼,中間夾著點點肉碎
濕潤可口,綿綿又不會太過黏,加上酸酸甜甜的茄膏就更開胃
但當然要預計是比其他意粉種類更稔軟,不是Al dente的煙韌嚼感

Explosive Volcano $158

就是上網看到這個才想到要來一試的,藍藍火焰的誘人昭然易見
店員先將薄餅塔捧上桌,再拿來一小瓶蓋酒及打火機
讓我們預備好,她就徐徐淋酒於上,用打火機點起火焰
只可惜火焰又小又快熄,真是一閃即逝,拍出來能看的淨這張了:^(

薄餅堆成高山,我們還是小心揭開一片片看看裏頭……
好吧,這是空心的!
聲稱帶有蜜糖甜香的薄餅卻是淡而無味,只可以靠外頭的朱古力漿調味
問題是太過乾韌,表面一層有點朱古力漿潤口,但內裏什麼也沒有

此時幸有一旁的Gelato滋潤一下
黏身稠密,奶滑溜香,潤口帶果仁味,甜度得宜
剛好能緊緊黏附於薄餅之上,一同吃來確是易入口一點
不過盤上的荔枝雖叫清甜爽口,連上薄餅及Gelato同吃,卻不太搭軋

一邊吃著,睇到呀爸神色不對,就覺得這次好像來錯了……
說實話,服務算是可以的
效率一般,食物準備時間都頗長,也許小分店人手真的不夠
用餐時間約兩三小時,而店內只有一半的入座率
不過開係果個僻少少既位,真心唔係好多人會留意到,莫論用餐

消費滿$250可以扭一次蛋,裏頭附現金劵換領劵
這個設計饒有趣味,算是稍稍讓客人玩樂及感到驚喜的裝置
當晚我們花逾$500,扭兩次蛋,中的都是$20現金劵

2014年11月10日星期一

Sweetology-純白的

Sweetology未開業之前已經有留意到
係又一城既指南都會顯示佢既logo
今次經過,原來試業啦,仲係第三日
直到11月17日,只開下午兩時至十一時,以及係只收現金
即刻急搵窩夫愛好者朋友過黎一齊試下佢:^D


餐牌設計精美有格調,清晰易暸
選擇款式多樣,除左有今次揀左既窩夫,仲有班戟、可麗餅……連中式糖水都有!

環境感覺十分高級,以純白為主調
大理石既地面同枱面都好有高貴感覺
整體裝修好適合影相架,只可惜係燈光分佈不平均就失色左啦

服務都唔錯既,起碼會儘快應先
雖然問職員餐點既問題就唔太回應到,但佢地好肯幫手去問廚
仲要之後係有回應既!唔係話扮幫你又走左去咁
睇隔離枱,似乎店方都好肯聽意見,會在乎客人既睇法



Valrhona Chocolate Marshmallow Sandwich with Movenpick Icecream $78+10%

一上枱真係有點驚艷,單睇賣相就感受到店方既用心
因為同佢餐牌入面既相片只有甚少出入……就係左右擺位既分別
試業期間可能客流量不高,且看日後既質素及穩定性了:^)
窩夫製成三文治,中間夾左棉花糖……
好啦唔講咁多,試左先!!!!!

窩夫外層微脆,內裏香稔軟綿
表面仲有薄脆既果仁片,增添香氣
本身已經係用朱古力粉漿,有牛奶朱古力既啡色
帶有淡淡朱古力香氣,表面淋上朱古力漿作點綴
咬開即可發現一大堆密麻麻微溶既Valrhona朱古力碎……
「朱古力」呢個詞究竟要出現幾多次?XDDDDDDDD
甜中帶有苦香,味道濃郁,可口順滑卻沒有一絲膩感

中間夾既棉花糖係大大粒既,綿香有彈性
仲要稍為烤過下,焦香金黃,溶溶地好吸引
只係始終有少少棉花糖既明膠味道?
雲尼拿汁細滑香濃,味道清甜自然,感覺不膩
一旁既焦糖脆脆香脆可口,焦糖香味濃重
食後稍有黏牙,不過唔會過於甜膩

雪糕又係重頭戲了!
Movenpick既雪糕非常足料大家應該知,店方亦大大球上碟不手軟
果仁同朱古力既味道互相交織,濃滑細密,易入口既甜度又怎能抗拒?

整份既窩夫三文治十分鐘就解決了
朱古力係重到想像唔到
睇餐牌見佢價錢都係六七十蚊,平時見有唔少伏野都係差唔多價
仲要開係又一城,大概有部分都係租啦,食物質素用料……
加上試業中又唔係連鎖店,都唔知係咪得個樣
連個中意食窩夫上哂腦既朋友都表示懷疑,唔係好想特登黎試
但結果係我地決定要叫埋其他朋友一齊掃MenuXDDDDD
希望正式開業後我地約到個……少人d既時間啦-____>-