2014年6月30日星期一

木槿-韓食匯 [已結業]

之前係團購見到有韓食放題
Menu選擇又都啱胃口
最後同朋友買左幾張劵約埋飯聚一下:^)

也許因為我地拖太遲先去訂位
原定去紅磡分店佢full booking
不過佢俾我地轉去土瓜灣新店:^)
咁都好d,唔使嘥錢又冇得食

韓式板燒


牛肉片係瘦版,食落唔覺好肥膩
牛肉醃得入味,烤完有點焦香
重點係佢唔會好老好乾,仲係帶有水份而不韌:^0

雞肉好夠味,冇雪藏味又冇血水
肉質稔得黎唔乾柴,燒後有微微焦香香氣


五花肉附有少少軟骨位,脆口可以咬下,唔會話太硬
五花既油香濃,仲有微微肉汁鮮香
切得厚薄適中,肉質嫩口而夠熟,亦唔會過膩

辣魷魚爽口彈牙,又係冇雪味既
辣味夠香,唔會過辣到食唔到咁浪費

料理


炆豬軟骨肉既部分好軟稔,一抿即化,脂肪亦不多
軟骨部分仍保留少許脆度,但絕對係好易咬開既爽口感
炆得非常入味,鹹中帶甜,仲要係好自然既味道,唔會覺膩


燒黃花魚外皮薄得黎好香脆,又冇泛油光
肉質卻竟然可以保持十分嫩滑
我自己唔多食呢種魚,覺得有少少腥味
但魚係全熟冇血水,肉又一夾就離骨
朋友食開話呢個品種其實係會有d腥腥地好正常

燒青花魚外表燒得微啡,一翻轉真係成塊都啡哂
講真有d驚中伏,因為好似魚乾咁個樣
點知食落去:^0000佢外面係超穌脆,一咬係好似食緊炸芋酥咁
但入面係保留濕潤感,感覺似食低油膩感既炸物!!!!!
魚肉又夠香,其實真係唔使再點調味


炒粉絲用番韓國果隻,粗身透明
煮得夠彈牙夠味,又唔會太過油
可惜係有少少黏成團,但一夾就可以鬆番開


辣炒年糕辣度一般,有點嚼勁,唔會過爛或過韌
配上蔬菜配料有點清新感,整體不過不失

小吃


炸餃子如相中可見,有些黏在一起了
泛著油光,食落係幾油膩
儘管佢炸得夠香脆,但佢油身,同埋入面感覺乾乾地
個人認為呢道就麻麻地囉


韓撈其實就係涼拌前菜
講真真係唔覺佢辣,豆芽同蘿蔔絲帶清甜,前者好爽口
呢個又係凍食既,感覺清新又開胃,可以先點一客喚醒味蕾


凍豆腐亦都係清新之選
辣醬係甜辣果種,配上青瓜絲同肉鬆,其實好夠味又香口
豆腐嫩滑,似乎唔係街市買果d,似係盒裝豆腐


脆瓜瓜又犯左同一個錯誤……痴埋一舊,但今次冇泛油
南瓜片甜味太淡,炸皮味道有點甜,就好似雞蛋仔咁
老實說,我覺得呢道菜真係一般,非必點

風味食品


泡菜餅酸辣香口,仲要有少少焦香味道
泡菜佔量其實係少既,但算啦冇咩所謂既
不過佢地既煎餅係好黏好軟糯果種,因此係易滯既食品,要量力而為


甜煎餅其實又係佢d糯感煎餅加上煉奶
呢個又幾得意既,係煉奶pancake既軟糯版
但因為佢係甜食,會比一般鹹煎餅更有膩滯感,建議分享食

本身點左兩次蔥餅都漏單就算數啦/___>\


海帶湯唔記得影相
味道唔會過濃過味精咁,有淡淡海帶鮮味
另外佢有dd肉既,飲落感覺都可以接受

飲品


果汁有得揀橙汁同提子汁
橙汁係冇味既
提子汁似乎有點藥水味

另外有汽水可樂果d揀既,飲番芬達算數……

服務還好既……佢唔會計時計到太準太盡
會有提你幾時賣單但唔會狂催
漏單時有出現,人手其實唔多夠

環境稍為狹窄,卡位張枱真心好細,唔夠位上食物
衛生情況可算不錯的,同埋佢燈光夠,感覺舒適乾淨d

Royal Plaza-Lion Rock-第三訪

繼續我地大家在獅子山下
今次係第三次來訪
感覺食物質素都仲保持到

沙律及前菜

都係cold cut同蔬菜咁
但佢今次有辣豆芽,爽脆之餘帶點辣味
加上係凍食,清新開胃,味道又唔會過激
另外仲有海帶沙律,呢個因為質感係滑身稔身,好易入口
清新得黎又唔會重青味:^)

甜品

牛奶燕窩布甸好重奶香,我記得佢聲稱用3.6牛乳
香口嫩滑冇大氣泡,不過對我黎講真係甜膩左d
賣相係幾吸引,又有燕窩絲又有金箔咁

朱古力蛋糕賣相好特別,外層用兩塊chocolate bar咁圍住
朱古力味十分香濃,甜中帶有苦味,整體感覺不過膩

藍莓奶酪唔只有果醬topping,仲有新鮮藍莓,味道清甜
奶酪部分滑嫩,奶味香濃,甜度唔算太高

橙味燉蛋既橙香味好勁
雖然話好自然,但我唔係橙味甜品迷所以真係不過不失

莓果芝士蛋糕質感較Creamy
味道稍甜,但重芝士香味
幸好餅底味道偏甜,可以淡化下芝士既微鹹膩感

班蘭蛋糕同連鎖西餅店出品雷同
香氣夠既但未算自然清新,沒有上輕下重既感覺
Chiffon這樣,但質感乾身左d

糖水

呢次係綠豆海帶糖水
清甜不膩,料足帶香氣:^)

柚子蜜

今次個杯係細少少,味道亦較濃


2014年6月25日星期三

牛角-燒牛舌

一路都幾中意去牛角燒肉
不過佢又唔係好平
因此通常end up去左韓燒……
但佢下午茶時段其實是有折的
咁無可能唔食架喎XDDD

牛舌+牛肋肉套餐

牛肋肉油花平均,燒完之後仲可以好嫩
另外佢油膩感唔高,牛味又重
牛舌薄但均勻,烤過後邊位有點脆度
肉質係幾爽既,唔會好韌:^)

麻醬豆腐都係幾正既前菜
麻醬芝麻味十分濃郁,仲有少少杰身
豆腐豆味清香,配上濃味既麻醬唔會太膩:^)

話說點呢個餐佢可以加錢轉牛角飯
以前食過牛角飯,紫菜加上醬汁真係幾惹味
飯粒好飽滿,粒粒分明,帶有彈粒,越嚼越香甜
仲有佢係可以再添飯架!!!!!!!!!!!!
喜訊
我真係食哂左兩碗,一粒飯粒都冇淨XDDD

2014年6月24日星期二

和民-我放棄

先前係尖沙咀諗黎諗去都唔知食咩好
行行下見到有和民喎
好多年冇食啦……對上一次都係同呀媽食既XDDDD
是但啦太餓唔想再搵落去了,就呢間啦

厚切牛舌陶板燒 $63

我相信我唔使講咩大家都明……
我唔期望同Menu圖完全一致
但你呢個「厚切」,仲要呢個大小……你覺得可以接受的麼?
重點係我仲要燒,燒完會縮水我諗燒過肉既人都會試過
大佬……你牛舌唔係鴨肝喎
好啦算啦,燒完一食……冇調味既:^)但佢附上既係蔥油……
算啦我倒豉油浸佢……得幾滴豉油喎多謝:^)
牛舌燒完係冇爽口既感覺,牛肉味一般
講真呢道係第一道上枱既菜式,你要我點面對點左而未黎既餸菜?

石鍋鮭魚魚子飯 $63

份量好的骰……我諗當零食食都得既:^)
魚子呈橙紅,雖然唔多有光澤,但都係合格既
三文魚油唔多,但味道幾香,而且冇咩膩感
因為佢真係冇醬汁乾爭爭咁,唯有將頭先既蔥油加豉油倒落去調下味
但個配搭都幾好喎XDDDD同平時火灸三文魚上面有蔥絲同一道理
飯底粒粒分明,唔會太淋爛太水,仲有少少飯焦,呢樣都OK既

特上壽司盛合 $73

呢個係有鮭魚、星鰻同吞拿既
鮭魚加左蟹籽同沙律醬,香魚油味,冇咩雪藏味同腥味既
鰻魚既味道係鰻魚,但佢個肉質係好稔好鬆既
吞拿冇腥味,厚度適中無筋,香口而不膩
似乎都可以喎……但下面既飯卷……
一夾已經鬆散,甚至係斷裂(我諗應該唔係我唔識夾囉……
做左十幾年人……第一次用羹食壽司,覺得新奇。

焗芝士年糕 $38

一上枱……咦Tapas size黎架喎:^)
不過呢道係出乎意料地令人滿意
芝士焗到帶點焦香,個賣相都好吸引
芝士味香濃,真係好牽絲架:^DDDDD
年糕軟糯帶米香,感覺又唔會太滯
可惜佢既醬汁唔夠均勻唔夠多,否則應該好可口好想一食再食

燒油甘魚鲛 $68

呢個價錢似乎算抵食
個大小有成隻手掌咁架,又夠多肉
連皮既位置帶有膠質,唔會太黏口但好香
外皮燒至微脆,而且冇鱗,食落有d烤過既香氣
肉質算實身,感覺唔會太老太乾,不過亦唔係好嫩滑就是了
調味剛剛好,唔會蓋過魚香魚鮮味,冇雪味又唔覺腥
呢份感覺良好xdddd

奇異果燒酒 $38

酒精濃度12%
本身想點芒果味,但佢售罄
睇得出好多奇異果籽,算係新鮮足料既
唔好睇佢個樣咁細,其實都有三四杯滿杯既份量架
味道酸中帶甜,冰沙質感又夠凍,好消暑好開胃咁
但唔知係咪我問題,我完全唔覺有酒味……
因此當左佢普通冰沙係咁灌:^0,都係完全冇飲左酒既生理反應:^|

講番服務
一開始感覺還良好的
但中段時間溝通之間覺得似乎有點未訓醒既感覺
飲食業是很辛苦的……我地要學識「包容」下……
不過可唔可以唔好黑面……
也許是太累了,但俾到客人既感覺係黑面+唔係好attentive……
可以講番下,如果叫到server,佢地效率都係ok架,但前提係你要叫到先

2014年6月23日星期一

泰豊廔-混亂間

先前係泰豊廔同家人試過食晏
感覺食物都OK,同埋當時既服務俾我想像中好
因此,今次我地仍然係揀左佢去食晚飯


關於坐位……
一行近二十人,有幾個小朋友,約枱時已講
但結果係十幾個大人一枱,幾個小朋友一枱……
好!算!當我地訂位果陣冇講清楚小朋友年紀
可能令佢地誤會果堆「小朋友」係可以完全Take care自己既年齡

因為我地分左兩枱,total近廿人
所以我地點既食物都係點雙份
不過我影就淨係影自己果枱姐:^)


五香牛腱

滷得夠哂入味,而且牛腱夠稔身
筋既部位係變左肉凍咁,唔會好難咀嚼
師傅切得每片都好薄,重點係薄唔代表偷工減料
因為呢道菜係偏濃味既,厚片反而會過鹹而突出唔到佢既五香味


燻魚

都係果句,好入味,仲帶少少炸香
有d骨既,不過唔算好subtle,好易就揀到出黎
魚肉冇腥味,調味適中,唔會過甜,可惜真係油左d
份量可以接受,畢竟佢只係前菜


片皮鴨

不得不點既片皮鴨
但今次個份量似乎少左d……
冇所謂啦,味道最緊要
食落都係好重鴨油香,片薄略脆,中間夾左層脂肪
不過加上醬汁、蔥段及餅皮等等,包住一齊食,油膩感瞬間大減
鴨肉香鬆,感覺新鮮起爐,整體都可謂合格既:^)


鍋塌豆腐

豆腐外皮沾上蛋汁再炸,除左有豆香仲有微微蛋香
本身一夾就有點擔心,因為外層真係好堅固,似係刀槍不入咁xddd
但食落……裏面既豆腐竟是滑得有如豆花,入口即化
調味唔會太過鹹,而且冇蓋過豆腐原味
呢道菜都算係驚艷之選


京爆羊肉

個名真心好好笑XDDD驚爆
羊肉羊羶味幾重,脂肪都多,不過佢係碎碎地薄片咁,感覺唔會太heavy
好多洋蔥同蔥等既配料,烹調後有鑊氣清香可口,完全冇辣冇嗆既
呢道其實都幾濃味,可以配餅或者配飯更易入口


咕嚕肉

我好中意食咕嚕肉,食親中菜都會想點呢道菜
呢度既咕嚕肉外層偏硬脆,肉質都係幾實淨
調味就不錯既,酸甜得黎唔會好膩
稠度剛剛好,可以沾滿包裹住食材
份量就一般般,因為佢配料都不少,所以肉塊既佔量就係可以接受既範圍


砂鍋津白

津白清甜夠新鮮,仲有點爽口
奶油香好濃郁,但唔會覺得好膩好油
加左火腿,有點肉香滲入湯底:^)
呢道就唔算好重口味,不過點都係油少少既,建議點小份以免太滯


京燒羊肉

乾身,有點參口,不過焦香味好重
羊肉肉味香濃,仲有點軟骨部分,咬落好脆好過癮
調味得當,唔會太濃味,反而令佢既羊肉香及微焦香更為明顯:^)


餃子

睇個樣係幾飽滿架,當然食落都係滿滿內餡既
內餡味濃,水分剛好足夠
因為佢乾上所以外皮係乾身,但入面都仲夠濕潤
外皮唔會太厚太硬,延展得勁,包到多餡又唔會穿(夾起都冇穿洞漏餡


小籠包

帶有少少湯汁,但外皮始終都係有點乾,夾起果陣好易會穿
(你可以話佢係皮薄既……
湯汁鮮肉味濃,唔會太鹹但夠香味
整體黎講唔會話油膩得不能接受
而且食果陣點下醋,酸酸地,解膩又開胃


家常蔥餅

蔥花似乎冇上次食咁多咁均勻
蔥香清,但感覺好淡,冇嗆既味道
餅皮外面一層係薄而脆,帶點煎過既微焦香氣
內層軟糯,濕潤
我會點下醬黎伴食,因為單食真係好寡咁:^0


蔥油餅

呢度既蔥油餅好特別,佢係水泡形既xddd
入面有好滿好多既青蔥餡,香味超級重,清香而不會有辣味
其實呢個蔥油餅唔會好油,餅皮有麵粉香
加上蔥花餡,越嚼越帶清香,越有清甜味(Y)


高力豆沙

感覺有點萎縮……
外皮係薄身炸過既,香氣好重,但今次……有點點油光
(可能影落唔太覺,因為我成日影到out of focus...
豆沙餡都仲係香甜帶清香,唔會覺得佢甜膩:^)

服務方面……
京燒羊肉係當晚問題癥結所在!!!!!
就係咁既,我地都係點左雙份
但staff以為燻魚係京燒羊肉,堅持自己已上雙份,話係我地食左
我地亦好堅持地解釋佢係真係上漏左
雙方各執己見,講真係成晚既心情一下子破壞哂:^(
最後講左好耐話會補番但又等勁耐都
話要剔除呢道菜退番錢又好似冇退(佢仲係用緊人手單唔係電腦單final
我真係冇野好講……成個印象……除左冷笑,我做唔出其他反應
抱歉,當晚人流咁勁既時候發生呢d爭辯
但我……我地應該以後唔會再為經理增添麻煩:^)

2014年6月21日星期六

深井咖哩寶-西環寶

唔知點解好耐以前就聽過深井咖哩寶呢個名
有日突然諗起就上網搵下資料
先知道呢間出名之餘,仲算屹立多年
而且風評似乎也不錯,因而打算去試一試
但因為未去過深井,好似好遠咁又唔熟路
最後決定去西環既分店:^)

Menu有中英文同埋大部分有明碼實價
另外仲有不少相片
點餐時倍感輕鬆:^)

Masala Papadam

蒜香好重,不過味道唔會太嗆太辣
蔬果粒切得細碎,令味道突出,水分多到整淋胡椒餅
胡椒餅薄脆香口,胡椒味幾香
雖然同平時食果d一樣,都係有點油膩,但佢有蔬果粒蒜碎,當係油膩中一點清新xddddd

Kashmere Mutton

什果係罐頭貨/___>
不過酸酸甜甜,配上佢本身個醬汁都係唔辣既,味道會溫和d冇咁刺激
羊肉肉味香濃,冇雪藏味,羶味一般啦:^0
但佢肉質似乎有點實身,又未至於硬到起哂角
佢只係唔會好似炆羊腩咁入口即化姐!
其實呢道菜味道唔算太濃,但什果……如果唔係罐頭就好好多……
就算係少款式水果,感覺都會清新爽口過罐頭

Lamb Madras

呢一道係有一個辣椒標誌既(幾留意呢d,因為我唔係好食得辣
本身諗過好唔好轉其他唔辣既,但真係想試下呢味有椰汁既……
就算辣都要試架啦xdddd
椰汁香氣幾濃,不過唔會話蓋過咖哩香料味
羊肉比較稔身,有點點筋位係入口即化既:^)
咖哩底既辣度其實冇我想像咁誇張,主要都係香氣,而唔係著重於辣味
醬汁稠度我覺得係啱用黎點下包既,coat得住唔會好水咁亂咁滴

Cheese Naan

一上枱已聞到芝士味:^)(Y)
唔係好似pizza咁會牽絲,但芝士香味好濃郁
當然要撕開睇下中間係點架啦,原來d芝士係食到好死係餅皮周圍
因此即使係冇流心冇牽絲都仲好香,同埋分佈得均勻
naan bread帶點脆度,加上新鮮出爐熱熱地,分外可口

Onion Naan

驟眼睇有落到算係多蔥花,蔥香都幾清:^)食哂成份都唔會話好滯
首先係脆,但焦既部分係香口又未到黑色苦澀既程度
咀嚼之間嚐到有淡淡麵粉香,以及naan bread既甜味出左黎
配合蔥花既香氣,其實味道不錯,清新路線非重口濃味

Mango Lassi

甜中帶酸,酸奶味道香濃
芒果味唔會話好假好人工,飲落係有水果香係解膩既
份量都可以接受,亦唔會係成杯冰飲兩啖就冇
(每次遇到多冰我好嬲自己唔記得講要走冰……


環境其實幾舒適寬敞
講真唔知點解我好介意餐廳光暗(可能潔癖同埋對昆蟲很感冒
呢度雖然係室內又冇咩窗,但佢大門係全落地玻璃,光線可以透入黎
加上室內燈光都算光猛,感覺放心好多:^)